Úrvalsdeildin

Enn og aftur ætlar Craven Cottage að reynast Manchester United erfitt vígi. United pressuðu heimamenn í Fulham snemma leiks og þurftu ekki að bíða lengi eftir fyrsta markinu. Það var auðvitað reynsluboltinn Paul Scholes sem skoraði gott mark utan af velli með föstu skoti á 11. mínútu. Scholes hefur nú skorað 150 mörk fyrir félagið.

United náðu hinsvegar ekki að fylgja forskotinu eftir og hleyptu heimamönnum aftur inn í leikinn. Edwin van der Sar þurfti meðal annars að taka á honum stóra sínum í nokkur skipti í fyrri hálfleik. Fulham gáfust ekki upp, komu sterkir inn í seinni hálfleik og náðu að jafna á 57. mínútu með marki frá Simon Davies.

United komust hinsvegar aftur yfir með sjálfsmarki frá varnarmanninum Brede Hangeland á 84. mínútu. Misheppnuð tilraun hans til að hreinsa frá marki eftir hornspyrnu United leiddi til sjálfsmarksins sem var fremur klaufalegt.

Varamaðurinn Nani fékk svo gullið tækifæri til að klára leikinn þegar United fengu vítaspyrnu eftir að Damien Duff hafði handleikið knöttinn innan vítateigs. Nani tók spyrnuna en lét Stockdale í markinu verja frá sér. Þetta átti eftir að reynast mjög dýrkeypt þar sem Brede Hangeland tókst að bæta upp fyrir sjálfsmarkið og jafna metin fyrir Fulham á 89. mínútu með skallamarki eftir hornspyrnu.

Virkilega svekkjandi og klaufalegt jafntefli því staðreynd. Sir Alex Ferguson var ekki par ánægður með að klúðra tækifærinu að tryggja öll stigin þrjú í stöðunni 2-1 fyrir United en sagði þó að Fulham menn hefðu átt stigið skilið miðað við spilamennsku þeirra í seinni hálfleik.

„Þegar allt kemur til alls þá áttu þeir líklega stigið skilið þar sem þeir spiluðu mjög vel í seinni hálfleik. Fyrri hálfleikurinn var okkar eign. Markvörðurinn þeirra varði nokkrum sinnum vel þegar við hefðum getað komið okkur í þægilega stöðu. En í seinni hálfleik skiptu þeir um gír og spiluðu betur en við, ég verð að gefa þeim það - þeir áttu stigið skilið." sagði Ferguson og var jafnframt hissa á að Ryan Giggs hefði ekki tekið vítið sem Nani klúðraði.

„Við fengum tækifæri til að klára leikinn með vítaspyrnu þegar örfáar mínútur voru eftir. Ef þú skorar þá eru stigin komin í hús. En hæðin á boltanum er mikilvæg í vítaspyrnum og spyrnan var í slæmri hæð. Mér fannst að Ryan Giggs hefði átt að taka vítið. Þegar við lékum gegn Tottenham síðast þá skoraði hann úr tveimur vítaspyrnum í sama leiknum og Nani var á vellinum þá. Þú vilt ekki vera að gefa frá þér stig á kjánalegan hátt - við misstum klaufaleg stig hér í dag. Við gripum ekki tækifærið." sagði Ferguson að lokum.

- Daði Már