Úrvalsdeildin

Manchester United byrjaði tímabilið með öruggum heimasigri á Newcastle á Old Trafford í kvöld. Dimitar Berbatov, Darren Fletcher og Ryan Giggs skoruðu mörkin og var sigurinn aldrei í hættu.

Ferguson stillti þeim Scholes og Fletcher upp á miðjunni og stjórnuðu þeir algjörlega miðjuspilinu í leiknum. Nemanja Vidic var fyrirliði liðsins í dag og Wayne Rooney byrjaði í framlínunni þrátt fyrir orðróm fyrir leik að hann væri lítillega meiddur.

Fyrsta hálftímann í fyrri hálfleik var ekki mikið um færi en United voru meira með boltann. Það dró svo til tíðinda á 33. mínútu þegar Scholes sendi knöttinn á Dimitar Berbatov í teignum sem skaut hnitmiðuðu skoti í fjærhornið framhjá Steve Harper í markinu.

Nani og Valencia voru líflegir á köntunum og komust oft í góðar stöður en oft vantaði eilítið upp á síðustu sendinguna inn í teiginn. Á 41. mínútu dró hinsvegar aftur til tíðinda þegar Nani sendi knöttinn á Evra sem tók hlaupið inn í teiginn. Evra sendi fastan bolta fyrir markið þar sem Rooney náði að koma boltanum á Fletcher sem setti knöttinn í netið af stuttu færi.

Staðan var því 2-0 í leikhléi. Í seinni hálfleik hélt sóknarleikur United áfram en leikmenn Newcastle reyndu að beita tilviljanakenndum skyndisóknum með litlum árangri. Berbatov fékk tvö frábær færi til að skora í seinni hálfleik en hafði ekki heppnina með sér. Scholes var að spila glimrandi vel rétt eins og gegn Chelsea í góðgerðarskildinum og átti meðal annars nokkur vel valin hlaup inn í teiginn eins og hann gerði svo oft þegar hann var yngri.

United vildu greinilega skora fleiri mörk til að halda í við markatölu Chelsea sem settu sex mörk á nýliða WBA síðastliðinn laugardag. Chicharito kom inn á sem varamaður fyrir Rooney þegar hálftími var eftir af leiknum og var honum vel tekið af áhorfendum sem greinilega kunna vel að meta Mexíkóann.

Þegar fimm mínútur voru til leiksloka átti Scholes sendingu á félaga sinn Ryan Giggs sem hafði komið inn á sem varamaður. Giggs var ekkert að tvínóna við hlutina, tók boltann viðstöðulaust á lofti og setti knöttinn snyrtilega í fjærhornið. Virkilega vel gert hjá þessum reyndu leikmönnum sem hafa verið andlit Manchester United liðsins í fjöldamörg ár.

Flottur sannfærandi sigur í fyrsta deildarleiknum á nýju tímabili því staðreynd. Myndband af mörkunum úr leiknum má finna hér á forsíðunni. Næsti leikur United er svo gegn Fulham á Craven Cottage næstkomandi sunnudag, 22. ágúst.

Áhorfendur: 75.221

Dómari: Chris Foy

Byrjunarlið United: Van der Sar; O‘Shea, Evans, Vidic, Evra (Rafael); Valencia, Scholes, Fletcher, Nani (Giggs); Rooney (Chicharito), Berbatov

- Daði Már