Úrvalsdeildin

Manchester United spilaði við úrvalslið MLS deildarinnar í gærkvöldi. Leikurinn var hin mesta skemmtun og endaði með 5-2 sigri United þar sem nýjasti liðsmaður félagsins, Javier „Chicharito" Hernandez, skoraði laglegt mark eftir að hafa komið inn á sem varamaður í seinni hálfleik.

Leikurinn fór fram á Reliant Stadium í Houston og var enn eitt áhorfendametið slegið í æfingaferðinni hjá United. Fyrir leikinn fór fram glæsileg setningarathöfn sem innihélt meðal annars 200 klappstýrur, flugelda, þjóðsöngva og fleira. Ameríkanarnir eiga svo sannarlega hrós skilið fyrir umgjörðina í kringum leikinn.

United byrjuðu leikinn af miklum krafti og voru greinilega staðráðnir í að bæta upp fyrir tapið gegn Kansas City Wizards í síðasta leik. Federico Macheda skoraði eftir einungis 25 sekúndur eftir slæm mistök í vörn MLS liðsins. Macheda var fljótur að átta sig, stal boltanum af varnarmanni eftir að sá sami fékk slaka sendingu til baka og kláraði færið örugglega.

Macheda var aftur á ferðinni á 13. mínútu þegar hann skoraði sitt annað mark í leiknum. Það kom eftir hornspyrnu þar sem Ítalinn ungi var einn og óvaldaður í teignum og skallaði knöttinn örugglega í netið, óverjandi fyrir markmanninn.

Obertan neyddist til að fara af velli um miðjan  fyrri hálfleik vegna meiðsla. Tom Cleverley kom í hans stað og átti eftir að láta til sín taka seinna í leiknum.

MLS All-Stars voru hættulegir í föstum leikatriðum og tókst að minnka muninn í 2-1 á 64. mínútu. Ferreira átti þá fína aukaspyrnu inn á teiginn sem Ching skallaði í netið. Stuttu áður hafði Mexíkóinn Javier Hernandez komið inn á sem varamaður fyrir United og fékk að launum mikil fagnaðarlæti frá áhorfendum, en stór hluti Houston borgar er einmitt af rómönskum uppruna.

Örfáum mínútum eftir að Hernandez kom inn á var hann búinn að koma sér í fínt færi. Á 67. mínútu átti hægri bakvörðurinn Rafael laglega sendingu fyrir markið þar sem Hernandez náði að taka boltann niður en lét verja frá sér úr fremur þröngu færi. Engu að síður vel gert hjá stráknum sem virtist einbeittur í að komast á blað í þessum leik.

Á 71. mínútu var Hernandez kominn framhjá varnarmanni MLS og var við það að sleppa í gegnum vörnina þegar á honum var brotið. Darron Gibson gerði sér lítið fyrir og skoraði glæsilegt mark úr aukaspyrnunni og staðan því orðin 3-1 fyrir United.

Einungis tveimur mínútum síðar var staðan orðin 4-1 eftir mark frá miðjumanninum Tom Cleverley. Fletcher vippaði boltanum inn á teiginn þar sem Cleverley stakk sér í þröngt svæði, lék á tvo varnarmenn með því að lyfta boltanum yfir þá og kláraði svo færið mjög snyrtilega.

Nýliðinn Hernandez skoraði að lokum fimmta mark United á 85. mínútu eftir langa sendingu frá Fletcher. Hernandez stakk sér inn fyrir vörnina, tók boltann á lofti og kláraði færið með því að setja knöttinn yfir markmanninn í fjærhornið. Mjög vel gert hjá stráknum og áhorfendurnir á pöllunum gríðarlega sáttir.

MLS liðinu tókst að klóra aðeins í bakkann á 90. mínútu og minnka muninn í 5-2 undir lokin. De Rosario komst framhjá Wes Brown í vörninni sem var heldur kærulaus í sínum varnarleik og má segja að hann hafi gefið Rosario markið á silfurfati.

Í heildina mjög flottur leikur hjá United og fín skemmtun fyrir áhorfendur. Hér með er æfingaferðinni í Bandaríkjunum formlega lokið en næsti leikur United er við Mexíkóska liðið Chivas Guadalajara á föstudaginn. Javier Hernandez mun vera í aðalhlutverki í þeim leik gegn sínu gamla félagi og mun spila fyrir bæði lið í leiknum. Minna má á að allir æfingaleikir United eru sýndir í beinni útsendingu á sjónvarpsstöðinni MUTV. Finna má dagskrá stöðvarinnar hér - uppfærist daglega.

Byrjunarlið United: Van der Sar; Rafael, Brown, J.Evans, Fabio (Scholes); Nani (Hernandez), Fletcher, O'Shea, Obertan (Cleverley); Giggs (Gibson), Macheda (Welbeck).

Áhorfendur: 70.103 - mesti fjöldi sem mætt hefur á knattspyrnuleik á Reliant Stadium í Texas.

- Daði Már