Úrvalsdeildin

Sir Alex Ferguson álítur United hafa tapað tveimur stigum gegn Chelsea en ekki bjargað stigi fyrir horn þegar liðið jafnaði 3-3 eftir að hafa lent 0-3 undir á Stamford Bridge í gær. United hafi einfaldlega leikið mun betur. Þjálfarar beggja liðanna voru ósáttir við dómaratríóið en ákvarðanir þess skiptu sköpum í endurkomu United.

Manchester United og Chelsea gerðu jafntefli á Stamford Bridge í dag í ótrúlegum leik. Chelsea menn komust í þriggja marka forystu í síðari hálfleik en United áttu magnaða endurkomu sem hófst á 57. mínútu. Tvær vítaspyrnur frá Wayne Rooney og jöfnunarmark frá Javier Hernandez skömmu fyrir leikslok tryggðu United stig úr leik sem flestir héldu að væri svo gott sem búinn.

Manchester United unnu góðan sigur á Stoke City á Old Trafford í kvöld. Bæði mörk United komu úr vítaspyrnum. Javier Hernandez skoraði í fyrri hálfleik eftir að brotið var á Park innan vítateigs. Í síðari hálfleik var brotið á Valencia í teignum og Búlgarinn Dimitar Berbatov tók spyrnuna og skoraði.

Manchester United unnu mikilvægan útisigur á Arsenal í dag. Leikurinn var fjörugur og spennandi. United komust yfir rétt fyrir leikhlé með marki frá Valencia. Robin van Persie jafnaði leikinn í seinni hálfleik en það var svo Danny Welbeck sem tryggði stigin þrjú tæpum tíu mínútum fyrir leikslok.

Paul Scholes sýndi að hann á enn fullt erindi í lið Manchester United þegar hann skoraði fyrsta markið í 3-0 sigri á Bolton á laugardag. United yfirspilaði gestina en gekk illa að koma boltanum í netið.

Manchester United tapaði sínum öðrum deildarleik í röð þegar liðið mætti Newcastle á útivelli í kvöld. Fyrstu tvö mörk Newcastle voru af dýrari gerðinni. United lentu undir í fyrri hálfleik eftir laglegt mark frá framherjanum Demba Ba. Yohan Cabaye jók svo forystuna í þeim síðari með stórglæsilegu marki beint úr aukaspyrnu. Rétt fyrir leikslok setti Phil Jones boltann í eigið net á mjög vandræðalegan hátt.