Meistaradeildin

United vann leikinn í kvöld 3-2 en samanlögð úrslit eru 4-4 og kemst Bayern áfram á fleiri mörkum á útivelli. Darron Gibson kom United yfir strax á þriðju mínútu leiksins og Nani bætti svo við tveimur mörkum til viðbótar. En þetta dugði United ekki og eru þeir því úr leik í meistaradeildinni.

Wayne Rooney var í byrjunarliði United og kom það mörgum á óvart. Fyrir leik var talið útilokað að hann myndi spila leikinn en bati hans undanfarna tvo daga hefur verið ótrúlegur að sögn Sir Alex Ferguson.

United byrjuðu leikinn af miklum krafti og komust strax yfir á 3. mínútu með marki frá miðjumanninum Darron Gibson. Einungis þremur mínútum síðar skoraði Nani annað mark United með laglegri hælspyrnu eftir fyrirgjöf frá Valencia á hægri kantinum. United héldu áfram að pressa Þjóðverjana hátt á vellinum og gáfu þeim engan tíma á boltann. Það virtist vera að ganga virkilega vel upp þar sem United stjórnuðu leiknum algjörlega á þessum tímapunkti. Á 41. mínútu skoraði Nani þriðja mark United aftur eftir góðan undirbúning frá Antonio Valencia og virtist allt stefna í að United menn væru að tryggja sér öruggan sigur miðað við gang mála.

Stuttu fyrir leikhlé náðu þó Bayern menn mikilvægu útivallarmarki sem gaf þeim aukinn kraft. Ivica Olic skoraði úr þröngu færi eftir slaka varnarvinnu hjá Michael Carrick sem féll fremur auðveldlega til jarðar í einvígi sínu við króatíska framherjann.

Staðan í hálfleik var því 3-1 United í vil. Í byrjun seinni hálfleiks breyttist hinsvegar leikurinn algjörlega. Hinn ungi bakvörður Rafael da Silva fékk að líta sitt annað gula spjald í leiknum og var þar með rekinn af velli. United menn þurftu því að leika einum færri í rúmar 40 mínútur það sem eftir lifði leiks. Bayern menn nýttu sér það og fóru að pressa meira að marki United. Rooney var tekinn út af í kjölfarið en hann hafði fengið högg á ökklann fyrr í leiknum og gekk sýnilega ekki alveg heill til skógar. Varnarmaðurinn John O‘Shea kom inn á völlinn í hans stað, en þetta var fyrsti leikur O‘Shea síðan í nóvember á síðasta ári.

Bayern Munchen sóttu stíft en United fengu engu að síður nokkur ágæt færi þrátt fyrir að vera manni færri. Á 72. mínútu fengu Þjóðverjarnir hinsvegar hornspyrnu, boltinn barst á Arjen Robben sem tók boltann laglega á lofti og spyrnti honum í fjærhornið, óverjandi fyrir Van der Sar í markinu. Þar með var staðan orðin 3-2 fyrir United, samanlögð úrslit hinsvegar 4-4 og Bayern menn með útivallarregluna sér í hag.

Vonbrigðin leyndu sér ekki í andlitum leikmanna United í leikslok, sérstaklega þar sem spilamennskan var virkilega góð áður en þeir urðu manni færri. En vindar breytast hratt í knattspyrnunni og því ekki hægt að ganga að neinu vísu. Nú verða United menn að einbeita sér að deildinni en þeir sitja þar í 2. sæti, tveimur stigum á eftir toppliði Chelsea. Fimm umferðir eru eftir og er næsti leikur United gegn Blackburn á útivelli næstkomandi laugardag.