Fréttir þess efnis um að Bebe hefði ekki verið valinn í meistaradeildarhóp Manhcester United reyndust rangar. UEFA hafa staðfest að Bebe er í liðshópnum sem United tilkynnti eftir allt saman.

United skiluðu inn 25 manna liðshópi í meistaradeildinni í síðustu viku þar sem Owen Hargreaves var á meðal leikmanna sem voru skildir útundan. Ferguson ætlar sér greinilega ekki að taka mikla áhættu með Hargreaves enda hefur hann verið að glíma við þrálát hnémeiðsli undanfarin tvö ár og engin veit hvort eða hvenær hann kemur til baka.

Svo virtist sem Bebe hefði einnig verið skilinn útundan og margir fjölmiðlar héldu því fram að Ferguson hefði einungis valið 24 manna hóp í meistaradeildina. Hinsvegar hafa UEFA núna staðfest það að þessi 20 ára gamli leikmaður er á meðal nafnanna sem United tilkynnti í meistaradeildina og verður því löglegur með liðinu í riðlakeppninni sem hefst þann 14. september næstkomandi þegar United leika gegn Rangers á Old Trafford.

Það er þó ekki mjög líklegt að Bebe muni taka þátt í þeim leik. Það verður að teljast mun líklegra að Bebe muni spila sinn fyrsta aðalliðsleik fyrir United þegar liðið mætir Scunthorpe í Carling Cup bikarnum vikuna eftir leikinn gegn Rangers. Ekkert er þó víst í þeim efnum þar sem Ferguson sagði nýlega að leikmaðurinn yrði að vinna í líkamsformi sínu næstu vikurnar.

- Daði Már