Michael Owen spilar ekki meira á þessari leiktíð vegna meiðslanna sem hann hlaut í leiknum gegn Aston Villa um síðustu helgi. Wayne Rooney er einnig tæpur fyrir leikinn gegn Wolves á morgun en Ferguson var mjög ósáttur með að hann hafi verið látinn spila í 85. mínútur með enska landsliðinu í vikunni. Hinsvegar eru góðar fréttir af Owen Hargreaves og Federico Macheda sem eru báðir við það að koma til baka eftir löng meiðsli.

Michael Owen meiddist aftan í læri í úrslitaleik Carling Cup bikarsins síðastliðin sunnudag og mun því ekki vera meira með á þessu tímabili. Þetta þýðir einnig að hann mun ekki eiga möguleika á að fara með Englendingum á heimsmeistaramótið í Suður-Afríku í sumar.

„Þetta er mikið áfall, hann spilar ekki meira á þessari leiktíð." sagði Ferguson.

„Því miður reyndist þetta vera alvarlegra en við héldum í fyrstu. Hann mun fara í aðgerð á mánudagsmorgun. Þetta er áfall fyrir leikmanninn og svekkjandi fréttir fyrir okkur líka. Hann hefur ekki misst úr æfingu á þessari leiktíð til þessa. Ég held að grasið á Wembley hafi líka spilað sinn þátt í þessu ásamt óheppni." sagði Ferguson.

Owen, sem hefur skorað 9 mörk á leiktíðinni fyrir United, var hinsvegar bjartsýnn á framhaldið þrátt fyrir meiðslin.

„Ég hef notið hverrar einustu mínútu hér á minni fyrstu leiktíð með Manchester United og hef þegar upplifað mörg minnisstæð augnablik. Ég er staðráðinn í að koma til baka í betra formi fyrir næstu leiktíð." sagði Owen bjartsýnn.

Ferguson gæti því átt í smá vandræðum með að velja framherjaparið fyrir leikinn gegn Wolves á morgun en Wayne Rooney er tæpur fyrir leikinn vegna verkja í hné. Ferguson var mjög ósáttur með að Rooney hafi þurft að spila 85. mínútur í vináttuleik Englendinga og Egypta í miðri viku á þungum Wembley vellinum. Ferguson er þá kominn í hóp knattspyrnustjóra eins og David Moyes og Arsene Wenger sem hafa báðir gagnrýnt grasið á Wembley sem þykir mjög laust í sér. United eiga gríðarlega mikilvægan heimaleik í meistaradeildinni næstkomandi miðvikudag þegar þeir fá AC Milan í heimsókn og vill Ferguson væntanlega hafa Rooney í toppstandi fyrir það einvígi.

Hinsvegar eru góðar fréttir af Owen Hargreaves sem hefur ekki spilað með United síðan í byrjun september 2008. Þessi sterki miðjumaður hefur verið í langri og strangri endurhæfingu vegna hnémeiðsla og hefur endurkomu hans verið frestað trekk í trekk. En nú er búist við því að Hargreaves spili sinn fyrsta knattspyrnuleik í langan tíma með varaliðinu í næstu viku. Varaliðsleikurinn verður í beinni útsendingu á sjónvarpsstöðinni MUTV næstkomandi fimmtudag fyrir þá sem hafa áhuga á að fylgjast með hvernig Hargreaves vegnar í leiknum.

Einnig eru góðar fréttir af framherjanum unga Federico Macheda sem hefur verið frá undanfarið vegna meiðsla. Macheda mun byrja að æfa með aðalliðinu aftur í næstu viku og vill hann eflaust nýta tækifærið vel þar sem bæði Michael Owen og Danny Welbeck eru ekki lengur inn í myndinni, en sá síðarnefndi verður í láni út leiktíðina hjá Preston.

Ryan Giggs, Jonny Evans og Rio Ferdinand eru allir tæpir fyrir leikinn gegn Wolves á morgun en ættu örugglega að ná leiknum gegn AC Milan í næstu viku. Bakvörðurinn efnilegi Rafael da Silva er frá vegna meiðsla sem hann hlaut um síðustu helgi en ekki er búið að gefa út hvenær hann verður klár í slaginn aftur. John O‘Shea er sem fyrr frá vegna langtímameiðsla og spilar ekki fyrr en í fyrsta lagi í maímánuði ef allt gengur að óskum.

- Daði Már