Meiðslamartröð Owen Hargreaves er ekki lokið en hann var á dögunum skráður úr 25 manna meistaradeildarhópi Manchester United. Varnarmaðurinn Ritchie De Laet tók sæti hans í hópnum. Fyrr í vikunni hafði Sir Alex Ferguson vonast eftir því að Hargreaves yrði klár fyrir leikina gegn AC Milan en eitthvað virðist það hafa breyst.

Hargreaves hefur ekki spilað síðan í september 2008 eftir að hafa farið í aðgerðir á báðum hnjám til að bjarga ferli sínum. Hann kom til félagsins árið 2007 frá Bayern Munich fyrir um £17 milljónir punda.

Aðgerðin var framkvæmd á hinni heimsþekktu skurðstofu Steadman-Hawkins Clinic og vonuðust menn til þess að vandamál Hargreaves með hnén á sér yrðu þar með úr sögunni.

Síðan þá hefur þessi 29 ára leikmaður verið í stöðugri endurhæfingu en endurkomudagsetning hans í liðið hefur frestast allnokkrum sinnum. Hargreaves berst nú við það að afla sér sjálfstrausts í þeirri von um að koma til baka sem sami leikmaður og fyrir meiðslin.

Sir Alex Ferguson vonaðist eftir því að Hargreaves yrði klár fyrir leikinn gegn AC Milan í þarnæstu viku. En enn einu sinni mun endurkoma leikmannsins frestast um sinn.

Hargreaves var upphaflega í meistaradeildarhópi Manchester United í riðlakeppninni þar sem Ferguson vonaðist til þess að geta notað hann í lokaleikjum riðilsins. Þá var talið að Hargreaves yrði leikfær í lok nóvember en allt kom fyrir ekki.

En Ferguson er þolinmóður og sagði í viðtali að leikmaðurinn væri að æfa vel um þessar mundir.

„Owen er að gera mismunandi æfingar, bæði með varaliðinu og aðalliðinu. Hann æfir í tvo daga og hvílir svo í einn dag á milli."

„Þetta snýst um að hann nái upp sjálfstrausti sínu aftur og þegar hann hefur styrk til að æfa á hverjum degi þá er endurkomustund hans runnin upp." sagði Ferguson.

Hargreaves hefur einungis spilað 25 leiki fyrir United síðan hann kom til félagsins. Þrátt fyrir það spilaði hann þó stóra rullu í meistaradeildinni árið 2008. Hann hefur hinsvegar einungis spilað 3 leiki eftir sigurinn í úrslitaleiknum gegn Chelsea í Moskvu.

- Daði Már