Svo gæti farið svo að Phil Jones hristi af sér ökklameiðslin mun fyrr en áætlað var og er möguleiki á því að hann verði með í bikarleiknum gegn Liverpool um helgina. Búist var við því að Jones yrði frá í 3 vikur eftir að hann fór meiddur af leikvelli gegn Arsenal.

Eftir leikinn gegn Arsenal bjóst Sir Alex Ferguson við því að Jones yrði frá í nokkrar vikur og myndi missa af mikilvægum leikjum gegn Liverpool og Chelsea sem fram fara á næstunni. Hinsvegar hefur Mike Phelan, aðstoðarmaður Ferguson, gefið út að það sé möguleiki að Jones verði orðinn góður fyrir helgina og gæti mögulega tekið þátt í leiknum gegn Liverpool.

"Karakterinn hjá Phil er mjög góður. Hann var vonsvikinn með að undanfarnar vikur virðist hann hafa verið hálf haltrandi um völlinn. En hann nær sér yfirleitt mjög fljótt svo við erum bjartsýnir að hann gæti tekið upp á því aftur í þessu tilviki." sagði Phelan.

United hafa lent í miklum meiðslum á leiktíðinni. Fyrirliðinn Nemanja Vidic verður ekki meira með á leiktíðinni sem og miðjumaðurinn Darren Fletcher. Einnig hefur Tom Cleverley verið frá síðan í september, Ashley Young síðan í kringum jólin og Michael Owen er á hægri bataleið eftir að hafa tognað í læri. Nani fór frá Emirates leikvanginum um síðustu helgi með umbúðir á fætinum. Wayne Rooney og Michael Carrick fengu einnig högg í leiknum gegn Arsenal og eru smávægilega meiddir. Rio Ferdinand er enn og aftur að ströggla með bakmeiðsli og missti af leiknum gegn Arsenal og óvíst er hvort hann taki þátt í leiknum gegn Liverpool.

"Við erum ekki í besta standi með liðshópinn sem við förum með í næstu fjóra til fimm leiki. Hinsvegar getum við alltaf stólað á reynsluna og þau gæði sem við höfum hjá þessu félagi. Við verðum að gera það á næstu vikum." sagði Phelan.

- Daði Már