Bikarkeppnir

Manchester United urðu í dag enskir deildarbikarmeistarar eftir góðan 2-1 sigur á Aston Villa á Wembley leikvanginum. Michael Owen og Wayne Rooney sáu um markaskorun United eftir að James Milner hafði komið Aston Villa yfir strax í upphafi leiks með marki úr vítaspyrnu.

United vörðu titil sinn frá því í fyrra en þá sigruðu þeir Tottenham eftir framlengingu og vítaspyrnukeppni. Leikurinn gegn Aston Villa var oft á tíðum hin mesta skemmtun, opinn, hraður og skemmtilegur.

United hvíldu Edwin Van der Sar, Wayne Rooney og Wes Brown í dag. Rooney neyddist hinsvegar til að reima á sig takkaskóna og koma inn á í stað Michael Owen sem fór meiddur af velli í lok fyrri hálfleiks.

Aston Villa fengu draumabyrjun þar sem dæmd var vítaspyrnu á Nemanja Vidic eftir að hann braut á Gabriel Agbonlahor innan vítateigs á 5. mínútu leiksins. Stuðningsmenn Villa vildu einnig fá rautt spjald á Vidic en dómari leiksins, Phil Dowd, lét nægja að dæma vítið. James Milner tók spyrnuna og skoraði örugglega.

En Villa menn héldu forskotinu aðeins í rúmar tíu mínútur þar sem Michael Owen jafnaði metin með hnitmiðuðu skoti í fjærhornið hjá Brad Friedel. Dimitar Berbatov hafði unnið boltann af Richard Dunne í vörninni og keyrði í átt að marki. Dunne tæklaði Berbatov og boltinn barst til Owen sem þakkaði pent fyrir sig og kláraði færið.

Undir lok fyrri hálfleiks munaði minnstu að United færu með forskot inn í leikhléið en þá átti Ji-Sung Park gott skot sem fór í innanverða stöngina og var boltinn í kjölfarið hreinsaður af marklínunni af Carlos Cuellar, varnarmanni Villa.

Fletcher og Carrick stjórnuðu miðjuspilinu í seinni hálfleik. En það var ekki fyrr en á 74. mínútu sem United komust yfir í leiknum. Berbatov og Valencia áttu gott þríhyrningsspil saman, Valencia sendi boltann fyrir og auðvitað var Wayne Rooney mættur til að skalla knöttinn í netið. Þetta var 28. mark Rooney á tímabilinu í öllum keppnum, ótrúlegt afrek hjá þessum 24 ára framherja.

Rooney hefði getað gert út um leikinn skömmu síðar en fastur skalli hans endaði þá í stönginni. Villa menn reyndu hvað þeir gátu til að sækja undir lokin en gekk illa að skapa sér opin færi. Norski framherjinn John Carew kom inn á í stað varnarmannsins Carlos Cuellar en allt kom fyrir ekki.

Dimitar Berbatov og Antonio Valencia þóttu helst koma til greina sem menn leiksins af erlendum fréttamiðlum en þeir áttu báðir fínan leik að þeirra mati.  

Þetta var fimmti sigur United í enska deildarbikarnum og í fyrsta skipti í sögunni sem United tekst að verja bikarmeistaratitil frá árinu áður. Sigurinn í dag gefur vonandi góð fyrirheit um það sem koma skal á þessari leiktíð en United eru sem stendur einungis einu stigi á eftir Chelsea í deildinni.

Liðshópar:

Aston Villa: Friedel, Cuellar, Collins, Dunne, Warnock, Ashley Young, Milner, Petrov, Downing, Heskey, Agbonlahor.
Varamenn: Guzan, Luke Young, Sidwell, Carew, Delfouneso, Delph, Beye.

Man Utd: Kuszczak, Rafael Da Silva, Vidic, J Evans, Evra, Valencia, Fletcher, Carrick, Park, Owen, Berbatov.
Varamenn: Foster, Neville, Brown, Rooney, Scholes, Gibson, Diouf.